Комерцијална банка потврди дека пропаднале разговорите со Еуростандард
Објавено во: Финансии 11 Декември, 2019
Откако бизнисменот Трифун Костовски во интервју за Фактор објави дека неговата Еуростандард банка нема да се продава на Комерцијална банка, бидејќи двете страни не се пронашле во разговорите, и Комерцијална банка ја извести јавноста дека почетните разговори се прекинати, поради, како што велат, очигледните разлики во вреднувањето.
Од банката оваа објава ја дадоа како ценовно чувствителна информација преку Македонската берза.
„Во врска со претходната објава на Комерцијална банка АД Скопје за разгледување на можноста за стекнување акции издадени од Еуростандард банка АД Скопје, Комерцијална банка АД Скопје ја известува јавноста дека се прекинати почетните разговори и натамошното стекнување на информации, поради очигледните разлики во вреднувањето“, се вели во известувањето од Комерцијална банка.
Но, интересно е што од Комерцијална банка, во својата објава до јавноста, нагласуваат уште една работа, а таа е дека одобриле кредит од 10 милиони евра на компанијата на бизнисменот Трифун Костовски.
„Наместо тоа, а на нивно барање, Комецијална банка АД Скопје одобри долгорочен кредит во износ од 615.000.000,00 МКД (шестотини и петнаесет милиони денари) на Друштвото за трговија и услуги ГОФИ ДООЕЛ увоз-извоз Скопје, како должник, и ГОФИ-ГРОУП ОФ ФАИНЕНС АНД ИНВЕСТМЕНТ СА (GOFI-GROUP OF FINANCE INVESTMENT SA), како заложен должник“, информираат од Комерцијална банка.
Оттаму додаваат и дека овој кредит ќе биде обезбеден со залог над акции од Еуролинк осигурување.
„Долгорочниот кредит е обезбеден со залог од прв ред над 3.200 обични акции со номинална вредност од 1.000 евра по акција, издадени од ЕУРОЛИНК Осигурување АД Скопје и друг недвижен имот“, известуваат од Комерцијална банка.
А во интервјуто дадено за Фактор, бизнисменот Костовски обзнани дека разговорите со Комерцијална банка почнале кога банката минувала низ тежок период, но не се нашле во проценките. Сега, вели Костовски, банката е докапитализирана, и стабилна.
„Банката објективно минуваше низ еден тежок период. Тогаш влеговме во преговори и потпишавме спогодба за евнтуално меѓусебно договарање со Комерцијална банка за наше преземање. Меѓутоа, не се најдовме тука, и едноставно секој тргна по својот пат. Денеска банката е веќе стабилизирана, докапитализирана, таа е функционална, и очекувам дека со тек на време ќе ги надминеме сите оние лоши пласмани во правни лица. Имаме нов менаџмент, кој треба да биде комплетиран до крајот на оваа година, кој ќе ја преземе работата на банката. Комплетно ќе се менува целата структура на самото функционирање на банката, а со кое исклучиво ќе бидеме повеќе експонирани кон индивидуалните кредитоспособни коминтенти“, рече Костовски.