Конечно надвладеа паметниот телевизор во Македонија

Добивај вести на Viber

На крајот од 2018-та повеќе од половина од Македонците гледале телевизија и ги користеле интернет апликациите на паметни (smart) телевизори, покажува објавеното истражување на Агенцијата за електронски комуникации врз основа на спроведеното обемно истражување пред завршувањето на претходната година.

Може да се заклучи дека за прв пат повеќе Македонци користат повеќе паметни отколку обични телевизори. Анкетното истражување покажува дека лани 50,4 отсто од испитаниците поседувале дома паметен телевизор. Нема точна бројка колку од населението има само класичен телевизор, но 60,2 отсто истакнале дека имаат и таков и паметен ТВ.

На прашањето дали имате смарт телевизор на кој можат да се користат интернет апликации и да се пребарува на интернет, потврдно одговориле 51,1 отсто, а негативно 48,9 отсто. Тоа е за прв пат повеќе Македонци да имаат паметен ТВ отколку што не го поседуваат. Во 2017-та соодносот бил 45,8  кои имаат и 54,2 кои немаат. Во 2016-та само 37,7 отсто имале ваков тип на ТВ-приемник.

Сепак на една третина од поседувачите на овој телевизор истиот не им е поврзан на интернет, а само нешто повеќе од половина ги користат апликациите, во кои доминира ЈуТјуб. Иако се намалува, доминира кабелскиот приклучок, а само 15 отсто можат да си дозволат дополнителен пакет на ТВ-канали.

На зголемената употреба најголемо влијание има нивното намалување на цените, трендот и можноста за купување на рати со пакет-услугите кои инаку  доминираат кај македонските корисници.

Резултатите од пред три години на Евростат, кој користи друга методоогија, покажуваат дека во 2016-та кај 5 отсто од македонските домаќинства се гледа телевизија или други видео содржини на паметен телевизор (смарт ТВ), 3 отсто ги користат за да пребаруваат на интернет преку веб- пребарувач, а 2 отсто за други апликации, како игри или онлајн- шопинг. 

Бројките биле двојно помали од европскиот просек но, сепак, на овој план сме биле подобри од некои европски земји, меѓу кои Романија, Грција и Бугарија.

А.К.