Коронавирусот ќе ја „убие“ автомобилската индустрија
Објавено во: Економија 26 Март, 2020
Актуелната
криза со коронавирусот најмногу нескани последици ќе остави на автомобилската
индустрија. Таа, во автомобилската индустрија ќе трае многу подолго од
економската криза во другите сектори, вели за Фактор, Виктор Мизо, Генерален
директор на „Костал“ Македонија.
Овој сектор, како што појаснува Мизо, трпи последици од ширењето на коронавирусот, многу порано од сите други индустрии, пред се поради тоа што Кина, која беше првото жариште на пандемијата почна да ги затвора фабриките. Во тој момент се прекинал или се отежнал и синџирот за снабдување на македонските автомобилски компании, особено на оние кои произведуваат електронски делови за автомобили. Сепак, последиците по оваа индустрија, и на македонско и на светско ниво, засега не можат да се предвидат или да се пресметаат точно. Мизо, како врвен познавач на тековите во оваа област не сака да дава песимистички прогнози. Тој смета дека Македонија има начин да извлече корист од оваа криза. „За нас е важно како државата ќе одговори на барањата за помош од страна на бизнис секторот. Ова ќе биде важно и за мајките-фирми кои ќе споредуваат каква поддршка добиваат сестринските компании на други европски локации. Со тоа се отвора простор како држава да се позиционираме конкурентно, бидејќи во иднина многу локациски одлуки ќе бидат драстично афектирани од оваа криза. Тука и ние имаме потенцијална шанса и нормално резултатите и успехот ќе зависат и од мерките за поддршка од страна на државата, вели Мизо за Фактор.