КОСТОВСКИ: Со Законот за употреба на јазиците се фаворизира албанската заедница

Добивај вести на Viber

Дарко Костовски од ВМРО-ДПМНЕ денеска изјави дека парламентарното мнозинство предводено од СДСМ вчера донесе неуставен закон за двојазичност со кој се деградира употребата на македонскиот јазик. 

Според него, македонскиот се сведува на ниво на еден од јазиците кои се говорат во Република Македонија. 

„Овој закон е во спротивност со Амандман 5 од Уставот на Република Македонија. Со овој јазик се врши фаворизирање на само една етничка заедница – албанската, додека од друга страна сите други се маргинализираат“- смета Косовски. 

Вели дека можноста судските, управните, извршните, предистражните, истражните, кривичните, прекршочните, парничните, вонпарничните, за извршување санкции и другите постапки да се водат на еден од двата јазици ја релативизира официјалноста на македонскиот јазик.

„Дополнително невозможно е закон кој се носи со апсолутно мнозинство да се усогласува одредби во закони кои се носат со двотретинско мнозинство. Двојазичност на униформите на полицијата, здравствените работници и пожарникарите ја надминува уставната рамка. Според Уставот, двојазичноста може да важи за локални институции, а не во државните институции, како што тоа се прави со овој закон. Законот за двојазичност го надминува и Рамковниот договор во точка 6 од истиот, во делот на образование и употреба на јазиците“- вели Костовски.

Објаснува дека доколку СДСМ сакале да прошират одредени  јазични права тоа можеле да го направат со измена и дополнување на веќе постоечкиот Закон за употреба на јазикот што го зборуваат најмалку 20% од граѓаните на Република Македонија и во единиците на локалната самоуправа.