Костовски: Трајковски е принципиелен, сталожен и човечен, заслужува да биде на чело на Еуростандард банка
Објавено во: Финансии 23 Декември, 2019
Поранешниот прв даночник Горан Трајковски ги заслужува сите епитети да биде на местото прв генерален директор на Еуростандард банка. Ова вечерва го изјави Трифун Костовски, сопственик на Еуростандард банка, во гостување на Телевизија 24.
Како што е познато, неодамна во интервју за Фактор, Костовски изјави дека донесена е одлука Еуростандард банка да не се продава, туку да се докапитализира и стабилизира, а доби и ново раководство.
„Јас со него имав многу убаво искуство, уште како градоначалник на Град Скопје каде што ми беше генерален секретар. Тој објективно ги заслужува сите епитети да биде на тоа место каде што е денеска. Принципиелен е, сталожен е, има во себе и дипломатско, има во себе и многу човечко, така да сите елементи кои ни недостасуваа во банката, во него ги најдовме“, рече Костовски.
Тој нагласи дека предностите на Еуростандард банка во споредба со другите банки се големи. „Тоа е од аспект што ние ги коростиме и услугите од Македонски пошти. Имаме 20 годишен договор, тоа се сите експозитури по поштите, што значи дека заедно со нашите, имаме 330 експозитури“, рече Костовски. Тој додаде дека банката е веќе санирана и е во фаза на добивање на одредени согласности од Народна банка.