КРАЈ ЗА БОНДСТИЛ: Американските трупи ќе се повлечат од Косово?
Објавено во: Балкан 21 Февруари, 2020
САД ја разгледуваат можноста за повлекување на своите трупи од Косово, aко Приштина не ги укине царините на стоката од Србија.
Ваква информација се појави во Газета експрес. Како што пишува весникот, ова е најсериозна закана кон Косово. Амбасадорот на САД во Приштина Филип Коснет му кажал на косовскиот премиер Албин Курти дека неговата земја размислува за таквата можност.
Пред неколку месеци се шпекулирало дека Американците размислуваат за отстранување на базата Бондстил од Косово, доколку политичкото раководство продолжи да не ги слуша барањата на меѓународниот фактор за укинување на царините.
Весникот потсетува дека Курти и претседателката на косовскиот парламент Вјоса Османи, како кандидати за премиер на изборите на 6 октомври, ветија дека ќе ги укинат царините и дека ќе ги заменат со широки мерки на реципроцитет со Србија.
Американските власти сметаат дека премиерот Албин Курти, лаже кога рече дека ќе ги укине таксите.
Експрес ја цитира порака од вицепремиерот од партијата ДСК, Авдалах Хоти, дека партнерството на Приштина со САД е од витално значење и дека нема алтернатива. „Нашето партнерство со САД е од витално значење и нема алтернатива. Нема среден пат“, напиша Хоти на својот Фејсбук профил.
Претставникот на американскиот претседател Доналд Трамп за дијалогот Косово-Србија, амбасадорот Ричард Гренел, е категоричен дека царинитре треба да се укинат веднаш за да се продолжи со дијалогот.
Српските власти бараа да се укинат царините.
Косово воведе царини од 100 отсто за производи од Србија и од Босна и Херцеговина при крајот на 2018 година. Тогаш косовските власти рекоа дека Србија имала деструктивно однесување кон Косово.