КРИЗА ЈА „ТРЕСЕ“ ТУРЦИЈА: Дали тоа ги загрижува македонските туристи кои ја одбрале оваа дестинација?

Добивај вести на Viber

Летните одмори влегуваат во финишот, Турција ја „тресе“ економска криза поради турбуленциите  со лирата, но македонските туристи кои одлучиле да ја посетат оваа земја не се загрижени.

Аранжманите се веќе уплатени, што значи дека падот на националната турска валута нема да придонесе за поевтин одмор. 

Дури дел од туристите кои ќе одат на одмор го следат курсот на лирата во однос на другите валути, за да имаат во план колку таму би потрошиле. Откажување на аранжмани нема, а од туристичките агенции велат дека оваа година интересот за Турција е поголем од лани.

„Луѓето не ги фаќа паника, работата е тековна. Сите слушаме во медиумите што се случува во лирата, а граѓаните кои ќе патуваат на интернет го следат курсот на лирата во однос на еврото и доларот. Лани имаше послаб интерес поради тероризмот, но оваа година е подобро, интересот е поголем“ - велат од штипска туристичка агенција.

Од туристичка агенција во Кавадарци додаваат дека никакви промени нема поради кризата во Турција и дека граѓаните најчесто за одмор ја бираат Анталија.

„Никој за ништо не се пожалил, ниту дополнително нешто прашал. Оваа година најчесто се бараат Кушадаси, Бодрум, Анталија за 7 или 10 дена“ - додаваат од битолска агенција.

Драстичниот пад на вредноста на турската лира во однос на американскиот долар ја става Tурција пред најсериозниот економски предизвик по финансиската криза од 2001 година. На 10 август, кој економистите веќе го нарекоа „црн петок“, турската лира загуби речиси 16 проценти од својата вредност во однос на доларот. Ваквиот пад беше поттикнат од твитот на Доналд Трамп со кој најави воведување на увозни царини за турскиот челик и алуминиум. Економистите сметаат дека причините за проблемите на Турција, која е 17 светска економска сила и која бележи силен раст, треба да се бараат надвор од економските политики на Владата.