Кумуцакос: Коѕијас молчеше кога Димитров ја посочи Грција за иредентизам
Објавено во: Балкан 23 Април, 2018
Договорот за името треба да биде комплетен, целосен и конечен и да ја разликува соседната земја од грчката Македонија, порачува Јоргос Кумуцакос, одговорен за надворешна политика во грчката опозициска партија Неа демократиа.
Во интервју за грчкиот весник „Рил њуз“ Кумуцакос вели дека ваквиот договор не е изводлив, а навремено тоа го кажал и лидерот на партијата Кирјакос Мицотакис, пренесува МИА.
„Неодамнешните изјави од Скопје ставија кочница на целосно неопходната ревизија на Уставот на соседната земја и на спроведување на договореното име за сите употреби. Ваквата разврска е негативна за Грција, а прашањето не е дали продолжуваат преговорите, туку како продолжуваат и каде водат“, изјави Кумуцакос.
Тој, исто така ја споемнуав и изјавата на македонскиот министер за надворешни работи, Никола Димитров по средбата со Никос Коѕијас во Охрид, а се однесува на спречување на иредентизмот од двете страни.
„Не станува збор едноставно за потврдување на бескомпромисноста, туку за нови барања од скопската страна, конкретно на господинот Димитров кој, верувале или не го постави прашањето за иредентизам од страна на Грција, кон неговата земја. Ова не е чекор напред. Не е воопшто чекор што треба да се забележи. Тоа е чекор на сериозно уназадување. Нешто што се случи во присуство на министерот за надворешни работи на Грција, а господинот Коѕијас јавно молчеше“, вели Кумуцакос.