Лавина емигранти на границата, Грција вонредно ги замрзна барањата за азил

Добивај вести на Viber

Грција почнувајќи од денеска па во наредните месец дена нема да ги прифаќа барањата за азил од мигранти кои нелегално влегуваат во земјата и, кога е можно, веднаш ќе ги вратат во земјата од каде што влегле, објави во неделата грчкиот владин портпарол Стелиос Пецас.

Одлуката е издадена по завршувањето на состанокот на кабинетот за национална безбедност. Грција, исто така, ќе побара од Европската агенција за гранична и крајбрежна стража, позната и како Фронтекс, да се вклучи во брза интервенција на границата за да ги заштити границите на земјата, кои исто така се и границите на ЕУ, рече Пецас.

Горенаведените одлуки ќе бидат доставени до Советот за надворешни работи на ЕУ, така што Грција може да има корист од привремени мерки за соочување со вонредна состојба.

Пецас рече дека Турција ги крши своите обврски од договорот ЕУ-Турција од 2016 година и дека тргува со судбините на емигрантите. Тој го нарече мигрантското движење „ненадеен, масивен, организиран и координиран притисок над грчките копнени и морски граници“.

Чарлс Мишел, претседател на Европскиот совет, преку твит ја поздрави одлуката:

„Поддршка за грчките напори за заштита на европските граници. Тесно следење на ситуацијата на теренот. Ќе ја посетам грчко-турската граница во вторник“, твитна Мишел.