Ленче Ристовска била многу млада за да работи како Виш јавен обвинител
Објавено во: Македонија 23 Април, 2021
Поранешната обвинителка на СЈО, Ленче Ристоска, била многу млада за да стане член на Вишото јавно обвинителство. Ова е главниот аргумент на Советот за јавни обвинители откако вчера нејзиното име не се најде меѓу избраните кандидати.
Ристовска не го криеше своето разочарување од одлуката на Советот на јавни обвинители. Посакува барем да имало образложение зошто членовите на Советот гласале така како што гласале.
„Јас сум разочарана од одлуката на Советот. Навистина не знам зошто, и покрај демонстрираниот професионализам и интегритет, работата на случаи како „Таргет-Тврдина“, „Талир 1“ и „Талир 2“ и, паралелно, со тоа работа во „Еуроџаст“, за која сум пофалена од самата институција, јас не заслужувам унапредување“, рече таа синоќа за „360 Степени“.
Додаде дека би било убаво да се слушнат и причините и размислувањата на членовите на Советот, а не само нивната конечна одлука.
Ристовска го застапуваше основниот предмет на Специјалното обвинителство именувано „Тврдина-Таргет“, го докажа обвинението дека масовно, без судски налог, со години се прислушувале граѓани, а главниот обвинет Сашо Мијалков беше осуден со првостепена казна од 12 години.