Левендис бара Грција посилно да ја притисне Македонија

Добивај вести на Viber

Василис Левендис, се приклучува на реториката на помалите грчки опозициски партии кои својот рејтинг го билдаат врз македонски грб. Лидерот на Сојуз на централисти, по брифингот кој го доби од грчкиот министер за надворешни работи Никос Коѕијас истакна дека се залага да нема отстапки од позицијата против сложено име со вклучен терминот Македонија и воедно ја повикува грчката влада да ја притисне нашата земја да промени став во прашањето за името, наведува грчката агенција АНА-МПА.

- Господинот Коѕијас верува дека ако Скопјаните направат уште неколку отстапки, веројатно ќе се најде решение. Секако, кога вели решение, мисли на тоа да го содржи терминот Македонија. И ова го кажа без страв, рече дека сме голема држава и нема зошто да се плашиме од една помала држава, од Скопје. Но, јас му одговорив дека Турција е десет пати поголема од Грција, така што со истата логика, Турција ќе треба да прави што сака и ние да и се покориме на Турција, рече Левендис по разговорите со шефот на грчката дипломатија.

За попладневните часови закажана е последната средба на шефот на грчката дипломатија со лидерите на политичките партии во рамки на циклусот средби за брифирање за текот на преговорите. Никос Коѕијас овојпат ќе се сретне со одговорниот за надворешна политика во опозициската Нова демократија, Јоргос Кумуцакос откако лидерот на партијата Кирјакос Мицотакис одби брифинг со Коѕијас и побара тоа да го стори Ципрас.