„Левица“ стана „Десница“: Одлучи да ја поддржи Силјановска

Добивај вести на Viber

„Левица“ донесе одлука да ја поддржи Гордана Силјановска Давкова во вториот круг од изборите на 5 мај иако идеолошки не е на иста линија со ВМРО-ДПМНЕ, партијата која стои зад професорката како претседателски кандидат.

Ваква одлука донесе Президиумот на Левица на синоќешната вонредна седница, откако пред неколку дена Силјановска оствари средба со правниот застапник на оваа вонпарламентарна партија Димитар Апасиев.

„Силјановска ја сметаме за атипичен претседателски кандидат. И покрај нашите несогласувања по одредени прашања, знаеме дека таа е изградена личност со неспорен кредибилитет, која што ефикасно ќе се спротивстави на политиката на коалиционата двојка СДСМ-ДУИ, личност која ќе се води по принципите на правото, правдата и етиката и нема да дозволи компромитација на својот интегритет. Нашата поддршка за Силјановска да стане првата жена претседател на Републиката е строго персонална, а никако про-вмровска! Дотолку повеќе што повмровски кандидат во случајов е токму Стево Пендаровски кој беше портпарол во првата вмровска влада на Љубчо Георгиевски, а потоа и советник во кабинетот на Борис Трајковски“, гласи соопштението на „Левица“.

Инаку своевремено оваа партија беше дел од „Шарената револуција“, но потоа не го поддржа Преспанскиот договор, за на крај внатрепартиските односи да кулминираат со исклучување на влијателниот член Здравко Савески.

„Нашата соработка со професорката датира уште од времето на Професорскиот пленум, па оттука оваа наша поддршка ја сметаме за принципиелна и критична. Секој гласач на проф. Силјановска мора да ја држи за збор, будно да го следи секој нејзин чекор и да ѝ помогне да не потпадне под влијанието на големите партии СДСМ – ДУИ – ДПМНЕ. Нам сега ни треба реализирана и принципиелна личност за претседател, која нема да биде обична марионета, туку мудро ќе ги користи своите уставни овластувања со цел да не дозволи тотална власт на само една партија“, велат од таму.

Од „Левица“ претходно донесоа одлука дека не треба да се бојкотираат претседателските избори а за истите велат дека ќе гласаат за личност, а не за партија. Велат дека ќе ја поддржат Силјановска за да се обезбеди баланс во политиката и да не се дозволи апсолутна политичка моќ во рацете на само еден центар.