Коњско месо со декларација „телешко месо“ влезе во Хрватска
Објавено во: Балкан 27 Јули, 2021
Коњско месо со декларација „телешко месо“ влезе во Хрватска, објави Европол, кој веќе шест месеци работи на истражување на трговијата со фалсификувани прехранбени производи.
Коњско месо се продаваше како телешко во продавници и преку интернет. Ова го откри Европол, агенција на ЕУ, која им помага на европските земји во борбата против меѓународните злосторства и тероризмот. Во Хрватска најмногу фалсификати има меѓу алкохолните пијалоци - преовладуваат вино и вотка. Вредноста на нелегалната храна и пијалок запленети во оваа операција е 54 милиони евра, а издадени се над 600 глобални потерници.
Царинската управа учествуваше во акцијата, што се спроведе преку зголемен надзор и контрола над автомобили, комбиња, камиони и автобуси, како и преку зголемен надзор на лица и возила што ја минуваат државната граница. Тврдат дека не се пронајдени неправилности. Освен Царинската управа, ветеринарната инспекција, Министерството за земјоделство, Агенцијата за храна и Државниот инспекторат не знаеја ништо за оваа стока.