Локалните бугарски обвинители: Не се 45, туку 44 загинати, еден од преживеаните недостасува
Објавено во: Македонија 25 Ноември, 2021
Локалните обвинители од местото каде што се запали автобусот на денешната прес-конференција фрлаат нова светлина на случајот - тврдат дека недостасува едно лице, а бројот на повредени наместо седум, бил осуммина. Главната поента од денешната средба со медиумите е дека се пронајдени 44, а не 45 изгорени трупа.
Портпаролката Милева од прес-службата на локалниот обвинител тврди дека херојот Љуљзим Сулејмани сведочел дека се спасиле осум, а не седум души со кршење на задното стакло. Тој бил сигурен во неговото сведочење.
- Го проверивме списокот и треба да има 52 патници. 44 изгорени трупа се пронајдени, а во болница има само седум повредени. Херојот кој сведочеше и кој ги извлекол останатите преживеани беше категоричен дека станува збор за осум души. Во моментов не знаеме каде е осмиот, рече Милева.
И главниот обвинител Борислав Сарафов потврди дека станува збор за 44 трупа и дека случајот останува загадочен, но сепак останува простор еден од патниците на списокот да се префрлил во меѓувреме во друг автобус.
Последниот спасен ќе се чека сам да се пријави, а во меѓувреме со македонските колеги ќе се споредуваат списоците за да се утврди неговиот идентитет.