МАКЕДОНЦИ РАСКАЖУВААТ: Еве како е сега во Катар

Добивај вести на Viber

Македонци кои се на работа во Катар, во време кога земјата се соочува со изолација од повеќе арапски земји,  велат дека животот таму функционира нормално.

Иако имаше најави дека Катар има залихи  храна за месец  дена, Македонка  која веќе две години е во Катар објаснува дека на рафтовите во продавниците има сѐ.

„Ситуацијата е нормална, се живее најнормално. По рафтовите има сѐ. Сѐ е во ред. Ништо лошо не се случува и сѐ функционира нормално. Ако не беше така верувајте дека јас веќе ќе се вратев дома. Во Катар знам дека има неколку девојки од мојот град кои тука се дојдени да работат. Mеѓу луѓето кои живеат во Катар, а не се странци првиот ден имаше паника за храна, но сега нема ништо. Медиумите малку ја преувеличија работата. Инаку овде повеќето се странци, а жителите на Катар не работат ништо и се многу богати. Има Индијци, Филипинци, Еѓипќани, Мароканци, Тунижани, Европјани, “ – додава таа.

Друга млада  девојка од внатрешноста вели дека засега нема некои посериозни проблеми и сигнали на криза, но ако вака продолжи, обемот на работа ќе се намали и ќе стагнираат вработувањата. Оние кои се вратиле во татковината и користат одмор, нема да летаат преку Саудиска Арабија до Катар, туку преку Иран со што летот ќе трае малку подолго.

„Храна има. Никој од колегите не се пожалил за нешто. Сѐ се одвива најнормално. Сега како што знаете дека е криза, а не може да биде тоа поголема криза од онаa на Балканот, работата ќе се намали. Нема да примаат многу луѓе како порано. Тоа е најново“ – вели И.Ј.

Освен Македонци, во Катар има и многу Срби кои таму заминале поради работа и високи плати. Српските работници исто потврдуваат дека состојбата во земјата е под контрола и нема сериозни проблеми и потешкотии засега, но повеќе детали не смеат да даваат затоа што потпишуваат договор и се обврзуваат на дискреција.  Платите се движат од 600 евра за луѓето од Индија и Филипини кои се слабо платени, а нашите луѓе таму заработуваат по 1200 евра. Најголеми плати земаат Европејците кои се ценети работници. 

Светските медиуми пишуваат дека Катар која е земја со 2.5 милиони жители од кои 90% се странци, ќе се соочи со недостиг на храна. 

Иако Катар е една од најбогатите земји во светот, ако почнат да се повлекуваат инвеститорите, веќе нема да биде иста. 

Саудиска Арабија, Египет, Бахреин и ОАЕ ги прекинаа дипломатските и другите врски со обвинување дека Катар поддржува тероризам. 

Сања Атанасовска