МАКЕДОНСКО ПИЛЕШКО НА МЕНИТО И НА КФЦ - отворен нов производствен погон на „Интернешанал фреш фуд“
Објавено во: Економија 26 Ноември, 2020
Македонско пилешко месо ќе биде на менито на популарниот американски синџир КФЦ.
Конзорциумот „Интернешанал фреш фуд“ ќе стартува со бројлерско производство во селото Гиновци во Општина Ранковце. Денеска беше отворен нов производствен капацитет за пилешко месо на овој конзорциум на домашни и странски инвеститори, а на отворањето присуствуваа премиерот Зоран Заев, вицепремиерот за борба против корупција Љупчо Николовски, министерот за економија Крешник Бештеши, за финансии Фатмир Бесими…
Се најавува отворање на нови 3.000 работни места, како и инвестиција од над 50 милиони евра во наредните пет години. Со отварање на „Интернешанал фреш фуд“ ќе се намали увозот на свежо пилешко месо и ќе се зголеми извозот на странските пазари.
Премиерот Зоран Заев нагкаси дека се работи за нова модерна инвестиција, со највисоки стандарди во производството на свежо пилешко месо.
„На овој начин ќе се намали увозот на свежо пилешко месо кој во моментов изнесува 95 отсто од домашната потрошувачка и ќе се зголеми извозот. Планот на инвеститорите е да создадат затворен круг на производство, почнувајќи од матични јата, инкубатори, станици, еднодневни пилиња, сопствени фарми, кланици, се до финален производ. Со изградбата на фарми и кланици низ целата држава за прв пат ќе имаме производство со запазување на најсовремените пракси за безбедност на храната“, изјави Заев и додаде дека со оваа инвестиција ќе се отворат 3.000 нови работни места и ќе се зголеми соработката со кооперантите и домашните производители на храна.
Освен во Гиновце, „Интернешанал фреш фуд“ ќе има свои фарми во Врапчиште – Тетовско, Кочани, Штип, Охрид Струга, Бетиница, Карбинци и Свети Николе.
Претставникот на компанијата, Абдулезел Догани рече дека ова е прва алка во еден голем ланец основан од домашен и странски капитал, чија основна дејност ќе биде производство на свежо пилешко месо.
„Во рамките на проектот предвидена е и изградба на фабрика за производство на храна во Свети Николе. На тој начин на земјоделците од овој регион ќе им се обезбеди сигурен пласман на земјоделските производи кој ќе се користат на храна на пилињата. Во наредните пет години вкупно ќе инвестираме 50 милиони евра, ќе го намалиме увозот и ќе го золемиме извозот на свежо пилешко месо, изјави Догани.
„Една од заложбите на Владата е зголемување на домашното производство на прехранбени и земјоделски производи.Чест ми е што денеска присуствував на почетокот со работа новиот производствен капацитет за пилешко месо“, порача Бектеши.
Според него, сопственото производство на храна е од голема важност за државата.
Се очекува дека ќе има голема побарувачка за свежо пилешко месо со оглед на фактот дека еден од партнерите на „Интернешанал фреш фуд“ е носителот на франшиза на КФЦ за балканските земји.