Максим Димитриевски: Уште чекам ВМРО-ДПМНЕ да ми го исплати денарот
Објавено во: Македонија 22 Април, 2021
Кумановскиот градоначалник Максим Димитриевски објави дека се уште чека еден денар симболична отштета и извинување од ВМРО-ДПМНЕза изнесени навреди и клевети за случај од пред четири години, по пресуда од кумановскиот суд.
Димитриевски ги тужеше и партијата ВМРО-ДПМНЕ и тогашниот претседател на кумановскиот огранок, Драган Петковски за клевети, кој Димитриевски го поврзаа со тепачка на семејна веселба на 5 април 2017 година.
„Очекувам ВМРО ДПМНЕ да ми исплати обештетување од 1,00 (еден) денар и јавно на прес конференција да ми се извини за изнесените клевети согласно правосилната судска пресуда (износот е симболичен бидејќи не ми се потребни нивните пари, образот е тоа што е важно).
Правдата е бавна, можеби доцни, но секогаш стига. Пресудата се однесува за случката во ресторанот кога на семејна прослава пред четири години бев физички нападнат од група лица блиски до ВМРО ДПМНЕ, настан кој подоцна тужените се обидоа во јавноста да го прикажат во поинакво светло и да ја искриват вистината, тогаш монтираа кривична пријава од политички мотиви со цел да ми го нарушат угледот во јавноста која што беше отфрлена од ОЈО Куманово“, објави Димитриевски.