МАЛКУ ЛИ СЕ ПАРИТЕ ЗА ПРОСВЕТАРИТЕ - Зошто СОНК не ги сака владините 10 отсто

Добивај вести на Viber

Размислуваа, мереа, и одлучија - не им се доволни 10 проценти зголемување на платите од април идната година како што нуди Владата. Ваква одлука вчера едногласно донел Советот на Синдикатот за образование, наука и култура, СОНК. 

Синдикалците со „контра“ барање до власта и до министерот за образование, Арбер Адеми. Бараат платите да се зголемат повеќе, и тоа да се случи не од април, туку веќе од јануари идната година. На Владата и дадоа рок од 15 дена да размислува, и ако нивните барања не ги исполни дотогаш, на 11 ноември ќе има генерален штрајк. 

Што го натера Синдикатот да се закани со прекин на работата на сите основни и средни училишта, и покрај владината понуда платите на образовните работници да се зголемат за 10 отсто?

Синдикалците велат дека овие пари се малку, а од Владата бараат и исполнување на колективните договори, исплата на регресот за годишен одмор К-15, како и на дополнителите часови работа. 

Премиерот Зоран Заев очекува разбирање од СОНК. Според него, платите на просветарите навистина се ниски, но се прават напори да се најде заедничко решение. 

„Правиме максимални напори. Ако тие се откажат од 10 отсто, фала богу и така тешко ги наоѓаме парите, ако не, не знам, ќе разговараме било што. Ние може да го споделиме и дадеме тоа што можеме да го дадеме, тоа што го нема е букавлно и невозможно. Сакам да испратам порака на разбирање, заради тоа што навистина ние сме свесни дека се ниски платите во образовниот процес, ги правиме просеците и паралелите со соседството, со целиот регион, но дефинитивно капацитетите на државата се токму тие“, рече премиерот Заев. 

Во последниве две години, платите на наставниците и професорите беа зголемени два пати за по пет проценти.