Мицкоски: Ги прифаќам и двата ТВ-дуели со Заев

Добивај вести на Viber

Христиојан Мицкоски, претседателот на ВМРО-ДПМНЕ, објави дека ги прифатил и двата ТВ-дуели со лидерот на СДСМ, Зоран Заев, пред парламентарните избори на 12 април.

„Во изминатите две недели до мене пристигнаа две понуди за ТВ дуел со Зоран Заев. Првата е на телевизијата Канал 5 за 28 февруари во гледаната емисија "Само Вистина", а втората понуда е проект на телевизијата Алфа што би се емитувал на 12 март. Јас и двете понуди за ТВ дуел со задоволство ги прифаќам, затоа што не бегам од соочување и не бегам од вистината, а Заев е тој кој е должен да одговори и да се соочи со фактите кои се одраз на вистината. За мене принципите и вредностите се тие кои треба да го движат општеството, а нема вистина без принципи“, објави лидерот на најголемата опозициска партија.

Мицкоски меѓу другото рече дека темите кои ќе ги постави во телевизиското соочување би биле случајот „Монструм“, за лиценците за производство на канабис за медицински цели, за „Рекет“, за потеклото на имот, но и за понудените програми како визија за Македонија.

„Се надевам дека Заев ќе се охрабри, нема да се крие позади скапо платените спотови, зарибана пропагандна машинерија и лажните вести и ќе прифати ТВ дуел. Па народот нека процени, затоа што тој никогаш не греши“, додаде Мицкоски.