Мицкоски ќе тужи ако не му се извинат за обвинувањата за криминал
Објавено во: Македонија 15 Април, 2018
Христијан Мицкоски му постави рок од два дена актуелниот директор на ЕЛЕМ Драган Миновски да му се извини за обвинувањата за криминално работење додека тој беше директор на државната енергетска компанија.
– Затоа колега Миноски ќе имате период од 48 часа да испратите јавно извинување за сите клевети и навреди што ги изнесовте денес, а притоа му нанесовте штета на мојот углед и чест или во спротивно се што изнесовте денес ќе мора да го докажувате низ судска постапка. Одите во погрешен правец и ве советувам пола од енергијата која ја трошите да ме извалкате со невешто читање на напишани соопштенија да сработите нешто за доброто на татковината, за граѓаните за ЕЛЕМ – пишува Мицкоски.
Претседателот на ВМРО-ДПМНЕ исто така вели дека Миновски на прес конференцијата признал дека ЕЛЕМ произведува 10 отсто помалку електрична енергија споредено со истиот период лани.
– Имаат прелив и притоа губат значителни количини електрична енергија и немаат развојна политика. Миноски со лаги, клевети и измислени тези упатени кон мене сака да ја покрие вистината за тоа како најпрво поништуваат тендери, и наместо вториот најповолен понудувач со веќе објавена цена се избира иситата таа фирма но овој пат со далеку повисока цена, и во договор во 4 очи, како се прави оглас за милионски тендери со услови кои може да ги исполни само една компанија, и како тие услови преку ноќ се менуваат само за да се покрие скандалот и ред други неправилности кои повлекуваат сомнежи за сериозен кримина – пишува Мицкоски.
Опозицискиот лидер вели дека сите овие сомнежи за криминал не се важни туку важни биле клеветите и измислените информации упатени кон него.