Мицкoски: Македонија е зафатена од силен ураган со име и презиме Зоран Заев
Објавено во: Македонија 17 Јуни, 2018
ВМРО-ДПМНЕ и натаму останува на ставот дека договорoт со Грција е капитулантски и дека со него се погазува интегритетот на државата и идентитетот на Македонците.
Лидерот Христијан Мицкоски, зборувајќи на протестот во Битола, порача дека на денот кога ВМРО-ДПМНЕ одбележува 28 години од постоењето, Македонија е зафатена од силен ураган.
„Македонија е зафатена од силен ураган со име и презиме Зоран Заев. Имаме Влада која го има епитетот капитулантска. Овој ист човек ја лажеше јавноста дека нема да прифати промена на Устав со цел промена на уставното име. На вакви луѓе дури и Барон Минхаузен може да им позавиди. Ќе го нарекуваме Заев-Минхаузен”- рече Мицкоски.
Мицкоски најави дека ВМРО-ДПМНЕ ќе се спротивстави со сите демократски средства на „капитулацијата што денес ни ја сервираа“ и повтори дека неговата партија нема да поддржи промена на Уставот, со цел промена на уставното име на државата.