МИЦКОСКИ НА СРЕДБА СО АМБАСАДОРКАТА ХОЛШТАЈН: ВМРО-ДПМНЕ прави напори за формирање ново парламентарно мнозинство
Објавено во: Македонија 28 Јули, 2020
Лидерот на
ВМРО-ДПМНЕ, Христијан Мицкоски денеска имал средба со новата германска амбасадорка
во Македонија, Анке Холштајн, на која и соопштил дека партијата прави напори
за формирање ново парламентарно мнозинство, што, како што рекол
Мицкоски ќе значи зафаќање со сериозна работа за надминување на тешката
криза во која се наоѓа државата.
-Потенцирав дека врз основа на добиената доверба од граѓаните и верувајќи во принципите и вредностите кои беа елаборирани од страна на Коалицијата за обнова на Македонија, правиме напори за формирање на ново парламентарно мнозинство што ќе значи зафаќање со сериозна работа за надминување на тешката криза во која се наоѓа државата, вели лидерот на ВМРО-ДПМНЕ.
На средбата со амбасадорката Холштајн, навел дека изборите не биле фер и демократски бидејќи, како што наведува, власта спровела низа прекршувања, поткупи и неправилности во текот на гласањето со што сериозно се нарушува демократскиот фундамент на изборите.
-Државата доби и сериозни забелешки за изборите нотирани од мисијата на ОБСЕ. Освен тоа што власта го осиромаши народот и ја втурна Македонија во тешка финансиска криза, спроведе организиран поткуп тежок неколку милиони евра. Со ваквото однесување се докажа дека власта прави озаконување на криминалот и корупцијата како главен супстрат на нивното делување, истакнал Мицкоски.