Мицкоски предупредува дека последиците по земјата можат да бидат погубни
Објавено во: Македонија 24 Септември, 2018
Претседателот на ВМРО-ДПМНЕ, Христијан Мицкоски од протестниот марш што вчера се одржа во Охрид, изјави дека Договорот со Грција е штетен и не треба да се прифати.
Побара од граѓаните добро да размислат за својата одлука затоа што, вели последиците можат да бидат погубни за земјата и македонскиот народ, неговиот идентитет, култура, историја, но и иднина. Според него, ова се времиња на искушенија и историски моменти.
Тој ја обвини Владата на Заев дека наместо исполнување на ветувањата и економски просперитет, ја однеле земјата во пропаст и дека се обидуваат со недемократски средства и закани да ги присилат граѓаните да излезат на претстојниот референдум.
Референдумот може да биде успешен само ако на него излезе потребниот број граѓани, смета Мицкоски. Тој порача дека доколку референдумот не успее, тоа ќе биде вовед во предвремени парламентарни избори, на кои, како што рече, народот ќе ја казни погубната политика на актуелната власт.
Партијата претходно повика граѓаните по своја волја и убедување да одлучат како ќе гласаат на референдумот.