Мицкоски стравува дека Заев ќе потпише нов штетен договор со Бугарија
Објавено во: Македонија 03 Декември, 2021
Нема да почитуваме едностран договор со Бугарија, вели лидерот на ВМРО-ДПМНЕ, Христијан Мицкоски.
Рече дека премиерот во заминување Зоран Заев е подготвен да потпише нов договор со Бугарија кој ќе значи асимилација и директен удар на идентитетот на македонскиот народ. Вели дека информациите кои ги добиле се алармантни.
„Зоран Заев во заминување е подготвен да потпише нов договор иако нѐ убедуваше дека ги решил сите дека ги решил отворени прашања со нашите соседи во кои делумно или целосно ќе ја прифати Резолуцијата усвоена од бугарскиот Парламент од ноември 2019, ако не грешам. Тоа претставува комплетно асимилирање на македонскиот народ и директен удар врз идентитетот. Бидејќи е во заминување, загрижен сум дека може да го направи овој потег, а последиците сите ние да ги плаќаме. Имајќи ги неговите состојби во Владата и коалицијата на ДУИ, или поточно со Али Ахмети и Артан Груби, се сомневам и загрижен сум дека овие информации се вистинити и дека тоа може да се случи“, изјави Мицкоски.
Вели дека се подготвени да разговараат за добро образование, за туризам, за инфраструктурно поврзување, но нема да прифатат уцени.