МИЦКОСКИ ЗА РЕАКЦИИТЕ ЗА СТОИЉКОВИЌ: Секој член на оваа влада мора да има промакедонски позиции

Добивај вести на Viber

Лидерот на ВМРО-ДПМНЕ, Христијан Мицкоски за реакциите за Иван Стоиљковиќ вели дека секој член на оваа влада мора да има промакедонски позиции.

Имаше реакции во јавноста од албанските партии по неговиот предлог Иван Стоиљковиќ, претседателот на Демократската партија на Србите да биде вицепремиер задолжен за односи со заедниците.

Мицкоски рече дека не би се согласил со тие ставови во врска со Стоиљковиќ и дека тој самиот ќе даде мислење ако го прашаат.

„Наша заедничка татковина е Македонија и очекувам сите заедно, 24-цата, но и сите оние стотици кои по вертикала ќе бидат избрани и именувани, да имаат исклучиво само промакедонски позиции и да се борат за нивната татковина Македонија. Промакедонска позиција подразбира и стратешкото ориентирање на Македонија, а тоа подразбира силен партнер во НАТО Алијансата и земја која еден ден од денеска ќе биде членка на Европската Унија“, изјави Мицкоски.

На прашање што доколку Стоиљковиќ биде ставен на црна листа на САД поради неговите средби во Москва, Мицкоски одговори дека „тој е човек кој е дел од коалицијата ’Твоја Македонија’ предводена од ВМРО-ДПМНЕ“. Вели дека верува во неговата чесност. 

Потпретседателот на ДУИ, Арбр Адеми, реагираше на одлуката на ВМРО-ДПМНЕ да го предложи Иван Стоилковиќ за вицепремиер и прв човек на министерството за односи со заедниците кое инаку го водеше Артан Груби.

„Охридскиот договор за прв пат по 2001 година во рацете на Србин со путинистички убедувања! Промената штотуку започна!“, напиша Адеми на Фејсбук.

Изет Меџити од „Вреди“ реагираше на обвинувањата на Европскиот фронт. Според него, ДУИ манипулира преку пропагандна машинерија. Тој ја потсети ДУИ дека ова министерство постои од 2008 година, а во рацете на Стоилковиќ не е унапредувањето и заштитата на правата на Албанците.

фото Фејсбук/Христијан Мицкоски