Мицкоски: Заев беше воајер, сега ги гледаме последиците
Објавено во: Македонија 19 Април, 2019
Христијан Мицкоски, лидерот на ВМРО-ДПМНЕ, се обрати на прес-конференција пред утрешниот изборен молк и ги повика граѓаните да излезат масовно да гласаат, како што вели тој, за промени и да не му остават простор на власта за уставни измени за начинот на изборање на претседател на Македонија.
- Доколку се избира претседател во Собранието ќе се создаде трговија со услуги. Да се поништува волјата на граѓаните не е баш европска Македонија. Ова е сценарио на Зоран Заев затоа што знае дека на фер и демократски избори ќе загуби. Да не пристапува кон методите на фалсификат, како на референдумот. Затоа, излезете и гласајте масовно за промени, се обрати Мицкоски.
Претседателот на најголемата опозициска партија коментирајќи ги новите прислушкувани разговори што се објавени вчера и денес рече дека тие се последица на воајеризмот на Заев.
- Го предупредував за неговото воајерско шоу во 2015-та, го предупредував да не го прави тоа и сегашните објавени разговори се последица на тоа што го предупредувавме одамна - рече Мицкоски, одговарајќи на новинарско прашање.
Го повика Заев да ги прифати предлог-амандманите на ВМРО-ДПМНЕ за иднината на СЈО и да се оди на гласање во Собранието за „да не се измачува јавноста“.