Мицотакис никогаш нема да употреби термин „Македонец премиер“?
Објавено во: Балкан 08 Февруари, 2019
Претседателот на Нова демократија, Кирјакос Мицотакис на расправата за ратификација на Протоколот за членство во НАТО, изјави дека ќе гласаат против Протоколот за членство затоа што е последниот чин од национално штетниот договор.
Тој повторно се осврна на македонскиот јазик и македонскиот идентитет за кои вели дека владата ги признала за соседите, истакна дека правно се обврзани „да ги нарекуваме соседите Македонци“.
„Јас никогаш нема да кажам добредојде за Македонецот премиер на земјата. Очекувам вие да го кажете тоа, господине Ципрас. И очекувам господинот Апостолакис, да ѝ посака добредојде во Грција на македонската војска кога ќе имаат заеднички вежби со грчката војска. Ова го имате потпишано“ – рече Мицотакис.
Тој изјави дека договорот ја поништил цврстата националната стратегија, „веќе 140 години Грција никогаш не дозволи некој трет да го монополизира терминот Македонија“. Додаде дека договорот никаде не споменува Македонци или Македонија за грчката Македонија или, пак, Грци Македонци или грчка Македонија, туку „грчката Македонија се одредува како Северен регион на првата страна“.