Михајлоска за Фактор: Изјавата на премиерот нема оправдување

Добивај вести на Viber

По повод изјавата на премиерот Заев која денеска е во центар на вниманието, Фактор контактираше експерти од областа на комуникациите.

Магистерот по комуникации и менаџер за стратешки комуникации во Image PR агенцијата за односи со јавност и комуникациски менаџмент Магдалена Михајлоска вели дека добрата изјава секогаш треба да биде кратка, јасна и концизна а јавните функционери мора да бидат подготвени и да знаат каква порака праќаат до јавноста.

Михајлоска потенцира дека изјавата на премиерот е несоодветна и избрзана.

„Јавните функционери кога даваат изјава мора да бидат добро подготвени и да знаат точно какви пораки сакаат да пратат до јавноста. Добрата изјава е секогаш кратка, јасна и концизна. Така нема да има потреба од извинување или дообјаснување. Изјавата на премиерот Зоран Заев е избрзана и несоодветна од повеќе аспекти. Прво, секоја изјава која треба да се дообјаснува еден час откако е дадена, носи политичка штета. Второ,  лично етикетирање на лица кои вршат дејности од јавен интерес како што се новинарите е недозволиво. Имено, новинарите во интерес на јавноста пишуваат за различни процеси во општеството со цел да бидат коректив. Добар новинар е критичар на секоја власт. Од друга страна одговор на секој јавен функционер кон новинар мора да биде единствено аргумент, факт, а не лични и субјективни ставови. И трето, нивото на говор мора да биде соодветно“, вели Михајлоска додавајќи дека за користењето на жаргони кои навредуваат еден дел од граѓаните нема оправдување“.