Мила Царовска: Неточно е дека сум се збогатила за една година, тоа е имот на родител
Објавено во: Македонија 25 Јуни, 2019
Мила Царовска, министерката за труд и социјална политика, демантира дека „се збогатила“ за една година, откако во евиденцијата на имотниот лист ја придодаде и вредноста од околу 1,3 милиони евра која ја поседуваат родителите.
Со реакција на Твитер објави дека тоа е имот на родител, кој не го поседува, а го пријавила иако нема обврска.
„Ве молам споделете. Апсолутно е неточен заклучокот дека сум се „збогатила“ за една година. Се работи за имот на родител, кој не го поседувам и го пријавив иако немам законска обврска. Барам извинување од Центар за истражувачко новинарство СКУП Македонија“, гласи реакцијата.Според анализата на СКУП во рамките на проектот Политички Експонирани личности, на нејзиниот пријавен имотен лист од септември 2018 година, вреден 212.990 евра, се додадени ставки вредни 1.378.607 евра, со што нејзината моментална имотна состојба изнесува 1.591.597 евра.
Од Министерството објаснуваат дека станува збор за надополнување на анкетниот лист со имот на родител, со кој Царовска не живее заедно. „Освен земјиштето во Јастребник кое што е ново стекнато, сите други ставки во анкетниот лист се надополнување. Надополнувањето е направено за поголема транспарентност, иако по Закон не треба да се пријави бидејќи станува збор за имот на родител со кој министерката не живее во исто домаќинство“.