Мила Царовска верува во „трансформацијата“ на луѓето што протестираа во Визбегово

Добивај вести на Viber

Мила Царовска, министерката за труд и социјална политика, на денешната прес-конференција рече дека верува во „трансформацијата“ на населението од Визбегово, каде што се одржа протест поради тројца тинејџери, кои беа принудени привремено  да го напуштат малиот групен дом каде што се згрижени поради тензиите.

- Јас верувам во силата на нашето население и во моќта на трансформација на нашите граѓани. Како што покажавме во Тимнајик, така и во Визбегово покажавме дека може да ги прифатат малите групни домови. Ние како општество се соочуваме со ваков тип на предизвици за да ги насочиме сите деца кон подобро утре. Тие ќе се соочуваат и натаму со потешкотии, но социјалниот систем треба секогаш да помогне. Благодарност до медиумите кои известуваат на позитивен начин, рече Царовска.

Таа додаде дека соседите од Визбегово треба да им дадат шанса на овие деца и да помогнат во нивната ресоцијализација.

- Тие се деца со 24-часовна поддршка и имаат право да се дружат со соседите. Имаат и воспитувачи кои треба да се грижат за нивното ре-воспитување. Да го извадиме максимумот од потенцијалот кој тие го имаат, наведе Царовска.

Таа додаде дека има уште две деца од Топанско поле кои треба да бидат сместени до крајот на годината во мал групен дом за процесот од овој проект да биде комплетиран.