МИЛИОНСКА СУМА: Колку пари државата инкасирала за пет месеци од данокот на добивка

Добивај вести на Viber

Додека од ДДВ се намалуваат приходите кои ги собрала државата за првите пет месеци од годинава, од данок на добивка сумите кои се инкасирани бележат раст.

Безмалку 114 милиони евра собрала државата од данокот на добивка во првите пет месеци годинава. Сумата е за дури 27 отсто повисока од истиот период лани. Од Министерството за финансии велат дека тоа се должи на зголемена наплата во повеќе сегменти. Но во истиот период државата наплатила за над три отсто помалку Данок на додадена вредност (ДДВ), данокот кој најдоминантно учествува во вкупните даночни приходи. Дали ќе има и каков ќе биде ребалансот на буџетот најверојатно ќе се знае набрзо.

Ако се анализира само данокот на добивка, од јануари до мај пораснале доплатите по даночни биланси и тоа за дури 34 проценти. Приходите од данокот платен по основ на месечни аконтации се зголемиле за 25,6 отсто. Во истиот период приходите од задржаниот данок за странски фирми се зголемиле за 22,7 проценти. Сепак во првите пет месеци годинава државата собрала за дури 45 отсто помал данок на добивка во споредба со истиот период лани по основ на дивиденди и други распределби од добивката.

Од ДДВ државата инкасирала во првите пет месеци 328 милиони евра, но тоа е за 3,3 проценти помалку во однос на минатата година. На даночните обврзници им е извршен поврат од 150 милиони евра што е за дури 33,4 проценти повеќе од истиот период лани.

Во структурата на ДДВ најголемо е учеството на ДДВ од увоз, кое расте во споредба со лани, додека се намалува кај прометот во земјата.

А.Т.