Министерот за надворешни работи Никола Димитров во работна посета во Бугарија
Објавено во: Македонија 13 Февруари, 2018
Од 14 до 16 февруари шефот на македонската дипломатија, Никола
Димитров, ќе престојува во работна посета на Бугарија, каде е предвидено да
оствари повеќе билатерални средби со
претседателот на Бугарија, Румен Радев, претседателот на Владата, Бојко Борисов
и министерката за надворешни работи, Екатерина Захариева.
Од Министерството за надворешни работи
(МНР) соопштија дека во рамки на билатералната средба со
министерката Захариева, која е закажана за 14 февруари, предвидено е Mинистрите
да извршат размена на ратификациони документи на Договорот за пријателство,
добрососедство и соработка, со што и практично ќе се заврши формалната постапка
за стапување на Договорот во сила, по неговата ратификација во Собранието на
Република Македонија, на 15 јануари и во Националното Собрание на Република
Бугарија на 18 јануари.
На покана на Високиот претставник на ЕУ за надворешни работи
и безбедносна политика, Федерика Могерини и министерката за надворешни работи
на Бугарија, Екатерина Захариева (во својство на земја претседавач со Советот
на ЕУ), министерот Димитров, на 15 и 16 февруари ќе учествува и на Неформалниот
состанок на Министрите за надворешни работи на земјите-членки на Европската
унија и земјите-кандидати за членство во ЕУ: Македонија, Албанија, Црна Гора,
Србија и Турција – GYMNICH. Дискусиите на состанокот ќе се фокусираат на
соработката и партнерството во областа на безбедноста и одбраната, информираа
од МНР.