Министерството за труд и социјална политика со прекршочна пријава против странски инвеститор
Објавено во: Економија 14 Февруари, 2019
Министерството за труд и социјална политика поведе прекршочна пријава против Веибо Гармент Продакшн и управителот Мустафа Иршат Канџа за прекршок на Законот за работните односи. Во следните денови се повикуваат да се јават во министерството и потоа писмено да се произнесат во врска со фактите и доказите наведени во барањето за покренување на постапката од страна на Комисиите за одлучување по прекршоци.
„Доколку сторителите во рок од 3 (три) дена од денот на приемот писмено не се произнесат по поднесеното барање, Комисијата ќе ја утврди фактичката состојба и ќе одлучи по барањето за поведување на прекршочна постапка врз основа на приложената писмена документација“, се вели во соопштението на МТСП.
Иако не е наведено официјално, извори од министерството велат дека станува збор за злоупотреби на Законот за работни односи по неколку основи. Ваквиот акт на министерството следи по укажување за прекршувањата кои во меѓувреме не биле надминати. Откако инспекторите утврдиле неисплатување на обврските и други неисполнети услови, сега на конфекционерот му се заканува санкцијата глоба.
Во 2014 година „Веибо Груп” како странски инвеститор од Турција најави план за изградба на најголемиот интегриран текстилен центар во Европа, во зоната во Ранковце, но работата се пресели во погонот во Крива Паланка. Работниците точно пред една година излегоа на протест со блокирање на патот поради неисплатени плати, но и неплатени придонеси и заради прекумерна работа.
Ситуацијата резултираше со прекин на работниот однос на 210 работници, сопственикот и управител на текстилната компанија “Веибо Груп”-Македонија, Мустафа Иршат Канџа се огласи преку соопштение во кое наведе дека не станува збор за тоа дека не можело да се обезбеди работа за фабриката, туку раководството не можело да го сработи договореното и навремено да го испорача на нарачателот.
А.К.