„Мислам дека Русија би сакала да види како завршува“: Трамп за договорот меѓу Украина и Русија, но Рубио не е толку оптимист

Добивај вести на Viber

Американскиот претседател Доналд Трамп изјави дека постојат „добри шанси“ за постигнување договор за прекин на конфликтот меѓу Русија и Украина по разговорите меѓу претставниците на Вашингтон и Киев во Америка, додека неговиот министер за надворешни работи Марко Рубио остана многу повнимателен во своите проценки.

Американската и украинската делегација ги опишаа разговорите одржани во Флорида за планот презентиран од САД пред десет дена како „продуктивни“, но Украинците и Европејците го сметаа за премногу поволен за Москва.

„Сè уште има работа што треба да се направи“, предупреди американскиот државен секретар Марко Рубио по разговорите меѓу украинските преговарачи и високите американски претставници во Флорида.

Извор во украинската делегација рече дека разговорите не биле лесни.

Тоа не го спречи американскиот претседател да го изрази својот оптимизам.

„Мислам дека Русија би сакала да види како завршува и... знам, Украина би сакала да го види како завршува“, рече Трамп во обраќањето до новинарите во претседателскиот авион.

Трамп, исто така, потсети дека Киев не е во завидна позиција, особено по големиот корупциски скандал што го натера украинскиот претседател Володимир Зеленски да го отпушти својот шеф на кабинет, Андриј Јермак, кој ги водеше преговорите со САД.

„Украина има некои сериозни мали проблеми. Тие имаат ситуација со корупција што не помага“, рече Трамп.

Пратеникот на американскиот претседател Стив Виткоф, кој учествуваше во разговорите во Флорида, и зетот на Трамп, Џаред Кушнер, треба повторно да патуваат во Москва во вторник на разговори со рускиот претседател Владимир Путин.

САД презентираа план од 28 точки пред десет дена, изготвен без европските сојузници на Киев, со намера да се стави крај на конфликтот што беше предизвикан од руската офанзива во Украина во февруари 2022 година.

Договорот првично предвидуваше украинските сили да се повлечат од источниот регион Донецк, а потоа САД де факто ќе ги признаат регионите Донецк, Луганск и Крим како руски. Но, планот оттогаш е ревидиран на барање на Европејците и не е јасно што содржи сега.

Друг извор за агенцијата Франс Прес изјави дека Американците сакаат да се договорат за последните точки од планот за да можат да одат во Москва.

„Формулацијата (на точките) останува комплицирана, особено на територијата бидејќи Американците се сметаат исклучиво за медијатори, а не како страна што го поддржува Киев“, додаде изворот.

Рустем Умеров, кој е главен преговарач на Украина, објави на Фејсбук дека му рекол на претседателот Зеленски дека е постигнат „значаен напредок“ во Флорида.

„Важно е разговорите да имаат конструктивна динамика и сите прашања да се пристапуваат отворено и со јасна цел да се гарантира суверенитетот и националните интереси на Украина“, напиша Зеленски по разговорите.

Францускиот претседател Емануел Макрон треба повторно да го прими Зеленски во Париз денес.

Марко Рубио, од друга страна, нема да присуствува на состанокот на министрите за надворешни работи на НАТО на почетокот на неделата.

На терен, Москва продолжува да врши силен воен притисок. Руската армија напредува во источна Украина, а во нов напад со беспилотни летала во ноќта меѓу саботата и неделата во близина на Киев загина најмалку едно лице, а 11 се повредени.