МИСТЕРИОЗНО ИСЧЕЗНУВАЊЕ: Каде и како избега осудениот за обид за убиство на Села, Никола Војминовски?

Добивај вести на Viber

Никола Војминовски, кој првостепено е осуден на 13 години и шест месеци затвор за обид за убиство на лидерот на албанската партија Алијанса за Албанците Зијадин Села, во текот на нередите во Собранието од април 2017, избегал а за него е распишана меѓународна потерница.

Војминовски, кој беше во домашен притвор, беше еден од клучните обвинети во процесот „27 април“ , кој македонското обвинителство го оквалификува како терористичко загрозување на уставниот поредок и безбедност.

Оваа информација ја потврдија од Кривичниот суд, наведувајќи дека за него е распишана меѓународна потерница.

Војминовски беше во домашен притвор се до правосилноста на пресудата.

-Полицијата која го контролирала домашниот притвор го известила судот дека обвинетиот не се придржува до определената мерка. По добиеното известување судот во Скопје донесе одлука за распишување на внатрешна и меѓународна потерница-соопштија од судот.

Војминовски во домашен притвор беше и пред донесувањето на осудителната пресуда, а потоа обвинителот Дарко Јакимовски бараше да биде продолжен куќниот притвор се до правосилноста на пресудата.

Тој е осуден на 5 јули минатата година, но одлуката ќе стане правосилна откако Апелација ќе донесе одлука за приложената жалба на одбраната.

Покрај Војминовски, во овој случај се осудени уште шест лица.

Еден од обвинетите, Сашо Сенков, беше ослободен откако обвинителството ја повлече тужбата против него како последица поради недоволно докази за неговата вмешаност.