Митко Чавков се побуни за амнестијата на пратениците, уставните судии не мислат така
Објавено во: Македонија 04 Декември, 2019
Иницијативата за поведување постапка за оспорување на Законот за амнестија донесен од Парламентот за настаните од 27 април беше негативно пречекана од уставните судии.
Судијата Осман Кадриу смета дека амнестијата е во надлежност на парламентот. „Дали во овој случај законот содржи дискриминација? Подносителот тврди дека не бил еднаков третманот за настанот кој е познат како крвавиот четврток. Амнестијата е акт на милост. Токму амнестијата е во надлежност само на Парламентот, а другите правни норми како помилување и аболиција се во надлежност на шефот на државата. Амнестијата се дава со закон кој го донесува Парламентот и не се дава на лица со име и презиме, туку групно и за конкретни кривични дела“, нагласи овој уставен судија.
Меѓу амнестираните за 27 април беа и петмината пратеници Крсто Мукоски, Сашо Василески, Јохан Тарчуловски, Љупчо Димовски и Љубен Арнаудов, кои беа обвинети дека ги отвориле вратите и ги насочувале лицата со фантомки и другите граѓани кон пленарната сала и кон прес-центарот во Собранието на 27 април. Амнестија добија и водачите на протестите на „За заедничка Македонија“, Богдан Илиевски, Владо Јовановски и Борис Дамовски, кои беа обвинети дека со своите говори ги повикале граѓаните да влезат во законодавниот дом.