Млада битолчанка одбрала рударска струка и во иднина сака да работи во рудник
Објавено во: Македонија 26 Јуни, 2019
Марија Христовска е млада битолчанка која избрала рударска струка и во иднина се надева дека ќе работи во рудник или ќе биде професорка доколку добие шанса за такво работно место.
Оваа млада девојка посетува настава во трета година во средното училиште „Таки Даскало“ во Битола.
Таа не се сложува дека ова е типично машка професија. За себе вели дека ги сака рудниците, сакала да научи нешто повеќе за минералите и затоа се одлучила за оваа струка.
„За рударската струка се одлучив така што сакав да научам нови работи за рудниците. Имав желба за зголемување на знаењата за минерали, кристали, настанокот на земјата, машините во рудниците, обработката на јаглен. Пракса посетуваме во Мак Мермер, Атанасови инокс и РЕК Битола и во училишната работилница каде што сечеме, дупчиме и обработуваме камен и различни видови на минерали“, вели Христовска.
Таа вели дека рударската работа бара голема одговорност.
„Мислам дека работата не е многу напорна, но одговорноста за работата на еден рудар е многу голема. Не гледам дека е машка професија затоа што по стручните предмети имам три професорки и еден професор, а каде што одам на пракса во РЕК Битола има многу жени коишто се инжинери, техничари и ракувачи. Образованието сакам да го продолжам на Факултетот за природни и технички науки во Штип. Во иднина ќе си барам работа за во рудник како инжинер, но ако ми се отвори можност за професорка би се вработила и во училиште“, додава Христовска.
Девојката вели дека сите кои ја познаваат имаат само позитивни коментари за струката за која се образува.
„Сите кои ме познаваат велат дека сум одбрала супер струка. Свесна за учење во оваа струка станав кога се запишував, но кога почнав да ја изучувам струката уште повеќе почнав да се интересирам“, рече Христовска.
Таа е единствената девојка меѓу учениците од трета година на насоката геолошко-рударски техничар во „Таки Даскало“ во Битола, и е одличен ученик.
Сања Атанасовска