ММФ: Продолжената политичка неизвесност го зеде својот „данок”

Добивај вести на Viber

Продолжената политичка неизвесност го зеде својот „данок” врз економскиот раст, преку страдање на инвестициите поради слабите одлуки. Формирањето на новата Влада означи важна пресвртница, констатираат од Мисијата на Меѓународниот монетарен фонд. 

Од ММФ месецов направи годишен преглед на македонската економија, при што се очекува по забавување на реалниот раст на БДП на 2,4% во 2016 година тој да се ублажи до 1,9% во 2017 година, а инфлацијата да изнесува 1,2%. 

Политиките сега треба да се фокусираат на обновата на баферите за фискална политика и спроведувањето на критичните реформи за повторно оживување на растот и да се направи нов притисок кон изгледите за пристапување кон ЕУ. 

Извештајот оценува дека среднорочната перспектива е поволна во зависност од континуираната политичка стабилност и силната надворешна побарувачка.

„Реалниот раст на БДП се очекува одново да се врати на повисоко ниво во 2018 година и постепено да се зголеми на 3,75 отсто на среден рок, поддржан од подобрените одлуки од страна на инвеститорите, проширените извозни капацитети и континуирано подобрување на условите на пазарот на трудот. Ризиците во однос на изгледите се во надолна линија“ - пишува во извештајот на ММФ.

Од Мисијата на ММФ велат дека во отсуство на трајни мерки за консолидација, фискалниот дефицит се очекува да се прошири и јавниот долг да порасне.

„На среден рок, проектираниот дефицит ќе остане над 3,5% од БДП како одраз на исплатата на неисплатените обврски, субвенциите за зголемувања на платите и дополнителна поддршка за социјална заштита. Како резултат на тоа, се очекува јавниот долг да достигне ниво над 53% од БДП до 2022 година, при што се проценува дека потребите за фискални финансирања на бруто ниво да достигнат 15,5% од БДП“- се вели во извештајот.

Мисијата ја поздравува намерата на Владата да го зајакне управувањето со јавните финансии и да ја зголеми фискалната транспарентност, а банкарскиот систем го оценува како здрав.

Владата не размислува да ја зголеми старосната граница за пензионирање, објаснува министерот за финансии,  Драган Тевдовски. Вели дека засега нема план за зголемување на даноци и акцизите за горива како што вчера во завршната изјава, по средбите во Македонија препорача ММФ.