Момче и девојка од Косово планирале напад во име на ИД во Италија, а потоа требало да заминат во Африка
Објавено во: Балкан 24 Јуни, 2022
Двајца Косовци се уапсени во Италија, затоа што планирале терористички напад во Тренто, пренесе Топ чанел, повикувајќи се на италијанската новинска агенција АНСА.
На 15 јуни, италијанската специјална единица на карабинери (РОС) која истражува тероризам и организиран криминал, со поддршка на регионалната команда на Тренто, издала наредба за ограничување против двајца млади, момче и девојка, со албанско потекло. Планирале да извршат напад со експлозивна направа во Трентино во име на терористичката организација Исламска држава (ИД), наведува Топ чанел. Тие биле обучени да вршат насилни дејствија.
Приведените се на возраст од дваесет години и се под истрага под обвинение за „заговор за тероризам, уривање на демократскиот поредок, регистрација и обука за терористички цели, вклучително и меѓународни“.
Италијанскиот суд на момчето му изрекол мерка домашен притвор, со обврска да ја носи електронската нараквица, со која се следи локацијата, а девојката ќе се брани од слобода.
Истражните дејствија покажаа дека двете лица, родени во Италија, во семејства со косовско потекло, долго време интегрирани во социјалниот, работен и студиски контекст, тргнале на пат на радикализација овозможена од џихадистичката пропаганда на интернет. По нападот, двајцата требало да отпатуваат во Африка за да се приклучат на терористичката организација.
Извршени се повеќе контроли со кои е овозможено запленување на компјутерска опрема и хемиски производи кои би се користеле за производство на експлозивни направи.