Мухамед Зеќири по изборот на новата функција: Огромна чест и уште поголема обврска

Добивај вести на Viber

Мухамед Зеќири, потпретседателот на СДСМ, објави дека му претставува огромна чест изборот за нов генерален секретар на Владата на местото на Драги Рашковски.

„Денес од Владата на Република Северна Македонија бев именуван за нејзин Генерален секретар. Огромна чест и уште поголема професионална обврска на патот кон реализација на зацртаната Програма за нашата држава. Благодарам за довербата!“, напиша доскорешниот пратеник на својот профил на Фејсбук.

Од друга страна се уште нема коментар од Рашковски по завршувањето на неговата функција.  Премиерот Зоран Заев пред еден месец рече дека генералниот секретар Драги Рашковски си поднел оставка уште пред месец и пол дена, но дека не му се прифаќа додека не биде пронајдена негова замена.

- Рашковски поднесе оставка пред месец и пол и ќе ја извршува функцијата додека не дојде нов генерален секретар. Ќе има нов генерален секретар но немаме донесено се уште одлука. Штом ќе ја донесеме, таа одлука ќе ја соопштиме, рече Заев.

Доскорешниот министер за администрација и информатичко општество Дамјан Манчевски се споменуваше како можна замена за Рашковски, но во меѓувреме тој пронајде ангажман во приватниот сектор, додека за Зеќири се шпекулираше дека ќе биде директор на Фондот за здравствено осигурување, откако минатиот месец си поднесе оставка како пратеник.