МВР: На Мицкоски му е дадено обезбедување на негово барање, никој не го апси
Објавено во: Македонија 04 Јули, 2019
Министерството за внатрешни работи ги демантира тврдењата на Христијан Мицкоски, лидерот на ВМРО-ДПМНЕ, изнесени синоќа во телевизиска емисија дека се подготвува негово апсење и дека е следен од тајни полициски структури.
„Министерството за внатрешни работи ги демантира лагите на лидерот на ВМРО-ДПМНЕ Христијан Мицковски изнесени во интервју за ТВ Алфа, а пренесени од дел од порталите, дека полициски службеници го следат од политички мотиви и подготвуваат негово апсење. Злоупотребата на МВР беше карактеристика токму на партијата чиј што претседател е Мицковски и токму поради тоа во изминатите две години во Министерството за внатрешни работи се спроведоа и во тек се реформи кои имаа за цел искоренување на незаконитите дејства. МВР својата работа ја фокусира исклучиво кон сузбивање на сите облици на криминал, користејќи ги законските можности што му стојат на располагање. Ја информираме јавноста и дека на лидерот на ВМРО-ДПМНЕ, на негово барање, од минатата година му е доделено обезбедување од припадници на МВР.“, велат од министерството.
Мицкоски синоќа рече дека актуелната власт размислува за варијанта за негово апсење и верува дека постојано околу неговиот дом има луѓе кои го следат неговото движење.
- Еве ова нека биде и апел до оние луѓе кои што се врткараат, една специјална единица на Министерството за внатрешни работи изминативе денови околу мојата куќа со изговор дека се тука да го набљудуваат училишниот двор на училиштето кое што е во непосредна близина на мојот дом. Јас сум подготвен и тука нема никаква дилема дека знам која е целта на оваа деспотска власт, кажа Мицкоски.