МВР со одговор до НСП: Проблемите на полицијата се решаваат

Добивај вести на Viber

Откако Независниот синдикат на полицијата излезе со остри обвинувања до министерот Спасовски дека не презема конкретни чекори за решавање на проблемите со кои се соочуваат полициските службеници, од МВР излегоа со одговор дека ќе има решение на сите состојби. МВР ќе се снабди со соодветна опрема и униформи за сите полицајци кои ќе може без пречки да ги извршуваат професионалните задачи.

Министерството за внатрешни работи го поздравува интересот на Независниот полициски синдикат, во соработка со раководството на МВР, да работат заеднички на подобрување на условите за работа на полицајците. Во министерството се затекнати многу проблеми кои биле наталожувани изминативе години и за кои ниту постоел ниту се пројавувал интерес јавно да се говори. Почнувајќи од сериозни аномалии во материјално-финансиското менаџирање со институцијата, бројни проблеми во организационо-кадровскиот дел, евидентно инфраструктурно и техничко уназадување, катастрофални стандарди и услови за работа и друго, велат од МВР.

„Досега пет објекти веќе се предадени во употреба. Исто така во поглед на елементарните потреби за нормално функционирање на полицајците се започна со набавка на нова и комплетна полициска опрема која што етапно и согласно посебните планови во рамки на организационите единици ќе стигне до секој полициски службеник“ стои во реакцијата.

Од МВР велат дела промени се започнати и во многу други сфери, но притоа примарно е што во министерство единствено простор им се отстапува на професионалците и добро обучени лица и нема простор за оние кои својата некомпетентност сакаат да ја скријат зад било каква организација.

ОД МВР информираат и дека министерот за внатрешни работи, Оливер Спасовски во изминатиот период имаше неколку средби со претставниците на Независниот синдикат.

„Раководството на МВР и натаму е отворено за соработка со претставниците на синдикатот бидејќи тоа е во интерес на сите вработени во МВР“, се вели во реакцијата упатена кон НСП.