НА КРАЈОТ НА МАЈ: Јавниот долг достигна 53,3 отсто, но тука ги нема парите од еврообврзницата

Добивај вести на Viber

Заклучно со мај, што значи пред повлекувањето на парите од еврообврзницата, јавниот долг на земјава бил на ниво од 53,3 отсто од БДП, обелодени денеска министерката за финансии Нина Ангеловска.

Ова е нивото на долгот откако земјава ги повлече заемот од ММФ и други кредити за надминување на кризата, но се уште ги немаше повлечено парите од еврообврзницата, на сума од 700 милиони евра.  

Инаку, на крајот на првиот квартал од годинава, јавниот долг на земјава беше на ниво од 50,7 отсто. Тоа значи дека за два месеци, задолженоста се зголемила за 2,6 процентни поени. Во тоа зголемување влегуваат заемот од ММФ и други кредити за надминување на кризата, но не и парите од еврообврзницата. 

Колку ќе се зголеми долгот со 700 милиони евра од еврообврзницата, би требало да се знае кога Финансии треба да ги објави бројките на крајот на овој месец, а ќе се однесуваат заклучно со крајот на првото полугодие. 

„За тоа колку ќе изнесува долгот, уште се доработуваат податоците, но ние оваа година ќе се потрудиме порано да го објавиме јавниот долг, односно податоците јавноста да ги има порано од законските рокови за транспарентност“, рече Ангеловска. 

Во моментов Владата не смета дека има потреба да се разговара за дополнителен ребаланс на буџетот, по само еден месец откако направи ребаланс со цел, како што вели првата финансиерка, токму да се одговори на кризата. 

„Има скратено непотребни трошоци, реалоцирани се сите дополнителни средства што му се потребни на секторот задравство, да тече непречено здравствената заштита, платите, пензиите и социјалната помош. Ќе ја следиме состојбата, реализацијата, во третиот квартал очекуваме подобрување и да видиме како тоа ќе оди, и секако,ако има потреба ќе се преземат дополнителни чекори. Во моментот ребалансот е скроен за да може да одговори на сите потреби на оваа криза. Имаме обезбедено и бафер на дополнителни средства ако треба да се прави до крајот на годината друг ребаланс и понатаму да се продлабочува дефицитот, и за тоа обезбедивме средства. Делувавме одговорно, подготвени сме и за полошо сценарио, но работиме за да се случи подоброто“, рече Ангеловска. 

Н.Н.Ф.