На местото на „ЕРТ“ се појави „НЕРИТ“?!
Објавено во: Балкан 17 Јуни, 2013
„НЕРИТ“ се појави на телевизиските приемници, а сеуште не е усвоен од парламентот предлог законот. ЕРТ веќе не постои во листата со канали, ниту ЕТ1, ЕТ3, или пак ЕРТ HD.
НЕРИТ не емитува програма, но сигналот постои од 6 часот утрово. Според информациите на вработените во јавниот сервис, кои продолжуваат со отвореното маратонско студио од вторникот вечер, новата државна телевизија се појавила нелегално, бидејќи законот се уште не е изгласан од парламентот, објави канал 5. Во средата, само ден откако беше донесена одлуката за затворање на ЕРТ, владата го објави нацрт законот за НЕРИТ (Нова грчка радио,интернет телевизија). Предвидено е најдоцна до 29 август да почне со работа на местото на државната ЕРТ. А според владиниот портпарол, ќе бидат вработени од 1000 до 1200 вработени.
Лидерите на трите партии кои се дел од владејачката коалиција во Грција, ќе се сретнат денеска, токму на датумот кога се навршува една година од нивниот избор, во обид да постигнат компромис за иднината на државната радио и телевизија ЕРТ или во спротивно ќе бидат во опасност да не можат да продолжат да управуваат, пишува весникот „Катимерини“.
Премиерот Андонис Самарас во петокот направи обид да го реши спорот со коалициските партнери од социјалистичката партија ПАСОК и Демократската левица (ДИМАР) во врска со ненадејното затворање на ЕРТ. Тој предложи оваа недела да биде составена меѓупартиска комисија, која ќе започна со именување на основниот персонал на новата радио и телевизија, како замена за ЕРТ.
Неговиот предлог беше одбиен од коалициските партнери, кои се против затворањето на државниот медиум и останување без работа на околу 2.700 луѓе.
„Катимерини“ го објави и истражувањето на „Метрон анализис“, според кое 68 проценти од анкетираните не се согласуваат со владината одлука за затворање на ЕРТ.