На предлог на Собранието се распиша, но Владата ќе ја предводи кампањата за референдумот
Објавено во: Македонија 12 Август, 2018
Иако на предлог на Собранието е распишан референдумот за договорот од Преспа на 30 септември и со тоа има предност во рекламирањето, Владата на РМ која ќе ја предводи јавната кампања со издвојување на средства, објави Сител. Тоа значи дека покрај оние околу три милиони евра што ќе ги потроши ДИК за организација на референдумот, ќе се издвојуваат државни пари и за промоција.
Владата ќе води кампања за референдумот на 30 септември што ќе биде платена со буџетски пари, потврдуваат од Илинеднска број 2. Таа ќе се интензивира после завршувањето на годишните одмори. Нема конректен одговор за тоа колку пари ќе бидат потрошени за јавната пропаганда и од каде точно ќе се земат овие средства.
Од владината прес службата велат дека ќе се работи за информативна кампања. Сепак, подеталните одговори откриваат дека владиното рекламирање нема да се однесува на начинот на гласање или информации за спроведувањето на референдумот, туку на содржината на самото референдумско прашање - Договорот и ЕУ и НАТО интеграциите.
„Владата на РМ во согласност со Законот за референдум ги дефинира начините преку кои ќе се реализира кампања од јавен интерес за информирање за прашањето кое го третира референдумот. Во однос на информирањето на граѓаните поврзано со референдумот Владата ќе води информативна кампања со буџетски средства согласно со принципите на јавен интерес“, одговараат д владината прес служба.
Под името хаштаг „Факти за договорот“ премиерот Заев, вицепремиерката Радмила Шекеринска на своите страници на Фејсбук, како и на фејсбук страницата влада.мк веќе се води владина кампања која се однесува на Договорот со Грција.
ДИК вчера излезе со став дека Владата ќе може по пазарни цени со народни пари да ги рекламира своите ставови за граѓанското изјаснување во текот на јавната пропаганда.