НАД 14 ИЛЈАДИ ВАКЦИНИ ДАДЕНИ ЗА ЕДЕН ДЕН - се забрзува масовната имунизација на граѓаните
Објавено во: Македонија 11 Мај, 2021
Рекорден број вакцини, над 14.000, примиле вчера македонските граѓани.
Од Министерството за здравство информираат дека вакцинацијата се одвива непречено на сите пунктови низ државата.
„Интересот за вакцинација секојдневно се зголемува, а досега бројот на лица кои изразиле желба за вакцинација преку веб платформата vakcinacija.mk е 303.574 граѓани“, велат под МЗ.
Прва доза вакцина вчера примиле 13.076 граѓани, а вчера вкупно се вакцинирале 14.033 граѓани. Во државата вкупно се аплицирани 145.043 дози вакцини, од нив 121.181 граѓани се вакцинирани со прва доза, а ревакцинирани се 23.862 граѓани. Со последните бројки, 35 отсто од населението над 70 години имаат примено барем една доза вакцина.
„Вакцинацијата се спроведува согласно Националниот план за имунизација. Се вакцинираат возрасни лица, граѓани кои искажале интерес за вакцинација на веб страницата vakcinacija.mk, а се вакцинираат и лица вработени во критична инфраструктура. Масовна вакцинација се одвива во неколку градови во државата и тоа во А1 СЦ Борис Трајковски во Скопје, во спортските сали во Кавадарци, Куманово, Тетово, Штип, Битола и Охрид“, се вели во соопштението од МЗ.
Министерството за здравство апелира до граѓаните масовно да се пријавуваат на vakcinacija.mk бидејќи тоа е најлесниот и најбрз пат да се вакцинираат.