Над 5 милијарди луѓе во светот ќе немаат доволно вода?
Објавено во: Свет 20 Март, 2018
Околу 3,6 милијарди луѓе живеат во области со потенцијални недостатоци на вода најмалку еден месец во годината, објави УНЕСКО во извештајот цитиран од CNBC.
Нивниот број може да се зголеми на 5,7 милијарди до 2050 година. Во изданието за 2018 година на Светскиот извештај за развој на ОН, објавен денеска, стои дека глобалната побарувачка за вода се зголемува за околу 1% секоја година и „ќе продолжи значително да расте“ во следните 20 години.
Еколошките решенија играат важна улога како во подобрувањето на квалитетот на водата и водснабдувањето, така и во ублажувањето на ефектите од елементарни непогоди, се вели во извештајот.
„Имаме потреба од нови решенија за управување со водните ресурси, за да одговориме на новите предизвици, предизвикани од прирастот на населението и климатските промени. Ако не направиме ништо, до 2050 година околу пет милијарди луѓе ќе живеат во области со недоволен пристап до вода. Овој извештај нуди еколошки решенија за подобро управување со водите. Тоа е сериозна задача која сите ние треба да ја исполниме заедно одговорно, за да спречиме конфликти поврзани со водата“- објави во коминике Одри Азуле, генерален директор на УНЕСКО.
Еколошките решенија се дефинираат како „инспирирани и поддржани од природата“. Тие или користат или имитираат процеси кои се случуваат во природата за да помогнат во подобрувањето на управувањето со водите.