Најчевска: Богоевски постави модел на оставка кој треба да го следат и другите
Објавено во: Македонија 24 Мај, 2019
Експертот за човекови права Мирјана Најчевска изјави дека вчерашната оставка од морални причини на Павле Богоевски е модел кој треба да го следат сите пратеници во иднина, без разлика дали се од власта или од опозицијата.
Таа вели дека тука влегуваат сите кои го кршат кодексот на етика, оние кои се судски и кривично гонети од СЈО и за настаните на 27 април, па дури и тие кај кои Комисијата за спречување на корупција пронајде наоди за вработувања на блиски со непотизам.
„Би било добро да поднесат оставка, бидејќи тие претставуваат илјадници луѓе ", истакна Најчевска.
Најчевска го повика ВМРО-ДПМНЕ да не го штити мандатот на Никола Груевски бидејќи така партијата останува промотор на „недопирливоста“ со која, според професорката, владеше и го инсталираше „груевизмот“.
„Размислувањето дека кога си на власт секогаш си во право и можеш да правиш што сакаш, без одговорност пред лицето на правдата, треба да се напушти“, вели Најчевска.