Напаѓачот од Нов Зеланд планирал и трет напад
Објавено во: Свет 20 Март, 2019
Напаѓачот од Нов Зеланд планирал и трет напад, соопшти полицијата.
Брентон Тарант, бил на пат кон трета цел кога го уапсија полицајците, изјави полицискиот комесар Мајк Буш денеска на прес-конференција. Тој вели дека полицајците спасија животи.
„Силно веруваме дека го запревме на пат кон друг напад“, рече тој.
Комесарот изјави дека осомничениот заминал кон третата локација за да провери дали има експлозивни направи. Буш не објасни дали третата локација била џамија или нешто друго, но рече дека се наоѓа во регионот на Крајстчрч.
„Апсолутно веруваме дека знаеме каде одеше“, рече комесарот.
Тарант во петокот уби 50 луѓе кои се молеа две џамии, оддалечени една од друга околу 5 километри. Буш додаде и дека полицијата пристигнала на местото на нападот за пет минути. Дваесет и една од жртвите се идентификувани, а се работи на тоа што побрзо да се идентификуваат и другите.
Првите погреби на жртвите беа одржани вчера. Погребени беа 44-годишниот Халед Мустафа и неговиот 15-годишен син Хамза. Од листата на жртвите која е објавена во неделата се гледа дека жртвите имале од 3 до 77 години. Тарант крвавиот поход го почна со две полуавтоматски пушки и две сачмарки. За сето оружје имал валидна дозвола која ја добил во 2017 година.