Народната банка ја намали каматата, како ќе калкулираат банкарите
Објавено во: Економија 13 Март, 2019
Народната банка ја намали основната камата за 0,25 проценти или од 2,5 на 2,25 проценти. Тоа е каматата по која банките купуваат од централаната банка благајнички записи и е еден сигнал за движењето на банкарските камати на кредитите и на депозитите. Одлуката за намалување на оваа камата Народната банка ја донела на редовната седница на Комитетот за оперативна монетарна политика. Олабавувањето следи по оценките дека има континуитет на поволни движења на девизниот пазар, што упатува на отсуство на притисоци во надворешниот сектор и стабилни согледувања на домашните субјекти.
„Истовремено, тековните движења покажуваат умерен раст на домашните цени, а со тоа и отсуство на ценовни притисоци. Дополнителен простор за монетарно олабавување создава и последната најава на ЕЦБ за задржување на каматните стапки на тековното ниво подолго од претходно очекуваното, како и за дополнително олабавување преку други монетарни инструменти, стои во соопштението од Народната банка.
Македонската економија порасна во последниот квартал лани за 3,7 отсто. Од централната банка велат дека во услови на ограничен обем на расположливи податоци, тешко може да се даде попрецизна оцена за состојбата во економијата. Сепак, според нив, достапните податоци упатуваат на натамошни поволни движења во економијата, при забрзан раст на активноста во индустријата и натамошен раст на прометот во трговијата.
Од Народната банка соопштуваат дека првичните монетарни податоци за февруари годинава покажуваат месечен раст и кај депозитите и кај кредитите, со поволни поместувања од аспект на валутната и секторската структура. На девизниот пазар, банките на нето-основа откупиле умерен износ на девизи во трансакциите со клиентите.